రాజ‌మౌళి – నాని కాంబోలో ‘ఈగ’ వ‌చ్చింది. అది సూప‌ర్ హిట్ అయ్యింది. మ‌ళ్లీ ఈ కాంబో కోసం ఆస‌క్తిగా ఎదురు చూస్తున్నారు ప్రేక్ష‌కులు ‘ఈగ 2’ ఆలోచ‌న రాజ‌మౌళికి ఉంది. కానీ అది ఇప్ప‌ట్లో సాధ్య‌మ‌య్యేలా క‌నిపించ‌డం లేదు. అయితే ఇప్పుడు రాజ‌మౌళి, నాని కాంబో మళ్లీ చూసే ఛాన్స్ వ‌చ్చింది. అయితే వెండి తెర‌పైకాదు. స్టేజ్ మీద‌.

మే 4 ద‌ర్శ‌కుల దినోత్స‌వం. ఈ సంద‌ర్భంగా తెలుగు ద‌ర్శ‌కులంతా క‌లిసి హైద‌రాబాద్ లో ఓ గ్రాండ్ ఈవెంట్ నిర్వ‌హించ‌బోతున్నారు. 4 గంట‌ల పాటు సాగే ఈ ఎంటర్‌టైన్‌మెంట్ షోలో.. చాలా స్కిట్లు, ఆట‌పాట‌లు చూసే అవ‌కాశం ఉంది. ఈ వేదిక‌పై నాని, రాజ‌మౌళి గ్యాంగ్ క‌లిసి ఓ స్కిట్ చేస్తోంద‌ని స‌మాచారం. ప్ర‌స్తుతం ఈ స్కిట్ కి సంబంధించిన రిహార్స‌ల్స్ జ‌రుగుతున్నాయి. రాజ‌మౌళి – ర‌మ క‌లిసి ఓ పాట‌కు స్టెప్పులు వేస్తార‌ని ప్ర‌చారం జ‌రుగుతోంది. అనిల్ రావిపూడి, త‌మ‌న్నా క‌లిసి ఓ పాట‌కు చిందేస్తార‌ట‌. మిగిలిన ద‌ర్శ‌కులు కూడా వాళ్ల వాళ్ల ప్ర‌తిభ‌ను ఈ వేదిక‌పై ప్ర‌ద‌ర్శించ‌బోతున్నారు. ఈనెల 4న ఎల్.బీ స్టేడియంలో ఈ ఈవెంట్ జ‌ర‌గ‌నుంది. చిరంజీవి ముఖ్య అతిథిగా హాజ‌రు కానున్నారు. బాలీవుడ్ నుంచి కూడా కొంత‌మంది ప్ర‌ముఖులు హాజ‌ర‌య్యే ఛాన్సుంది.