టాలీవుడ్ లో మ‌రో ఇంట్ర‌స్టింగ్ కాంబినేష‌న్ కి రంగం సిద్ధం అవుతోందా? నాని – శేఖ‌ర్ క‌మ్ముల కాంబోలో ఓ సినిమా రాబోతోందా? అంటే అవున‌నే అంటున్నాయి టాలీవుడ్ వ‌ర్గాలు. నాని, శేఖ‌ర్ క‌మ్ముల క‌లిసి ఓ సినిమా చేసే అవ‌కాశాలు పుష్క‌లంగా క‌నిపిస్తున్నాయి. నానితో ప‌ని చేయ‌డానికి శేఖ‌ర్ క‌మ్ముల‌, శేఖర్ క‌మ్ముల‌తో వ‌ర్క్ చేయ‌డానికి నాని ఆస‌క్తిని చూపిస్తున్నారు. నానికి స‌రిప‌డా క‌థ శేఖ‌ర్ క‌మ్ముల ద‌గ్గ‌ర సిద్ధంగా ఉంద‌ని టాక్. ఈ చిత్రంలో కథానాయిక‌గా సాయిప‌ల్ల‌వి అయితే బాగుంటుంద‌ని శేఖ‌ర్ క‌మ్ముల భావిస్తున్నార్ట‌.

నిజానికి ఓ సినిమా చేస్తుంటే, మిగిలిన ఏ ప్రాజెక్టుల మీదా శేఖ‌ర్ క‌మ్ముల దృష్టి పెట్టరు. అయితే ఈమ‌ధ్య ఆయ‌న పంథా మారింది. రెండు మూడు క‌థ‌ల్ని ఏక కాలంలో సిద్ధం చేస్తున్నారు. ప్ర‌స్తుతం ధ‌నుష్ తో ‘కుబేర‌’ రూపొందిస్తున్నారు శేఖ‌ర్ క‌మ్ముల‌. ఈ సినిమా షూటింగ్ శ‌ర వేగంగా సాగుతోంది. ‘కుబేర‌’ అవ్వ‌గానే ధ‌నుష్ తోనే మ‌రో సినిమా చేసే ఛాన్సుంది. ఒక వేళ ధ‌నుష్ మ‌రో ప్రాజెక్టుతో బిజీ అయితే, శేఖ‌ర్ క‌మ్ముల ఇంకో ఆప్ష‌న్ వెదుక్కోవాలి. అందుకోసం నానిని దృష్టిలో ఉంచుకొని ఓ క‌థ రెడీ చేశార‌ని స‌మాచారం. మ‌రోవైపు నాని కూడా త‌న లైన‌ప్ ని స్ట్రాంగ్ చేసుకొంటున్నాడు. ‘హిట్ 3’ త‌ర‌వాత సుజిత్ తో ఓ సినిమా చేయాలి. ‘ద‌స‌రా’ ద‌ర్శ‌కుడు క్యూలో ఉన్నాడు. వీటి మ‌ధ్య శేఖ‌ర్ క‌మ్ముల‌కు డేట్లు ఎప్పుడు ఇస్తాడో చూడాలి.