బాణం, సోలో లాంటి డీసెంట్ హిట్స్ తో త‌న ప్ర‌యాణాన్ని ప్రారంభించాడు నారా రోహిత్. త‌న ఖాతాలో ప్ర‌తినిధి లాంటి మంచి సినిమాలున్నాయి. అయితే ఆ త‌ర‌వాత ట్రాక్ త‌ప్పాడు. వ‌రుస ఫ్లాపులు, ఆ త‌ర‌వాత విరామం. ఇటీవ‌ల ‘ప్ర‌తినిధి 2’ అంటూ ఓ ప్ర‌య‌త్నం చేశాడు కానీ ఫ‌లించ‌లేదు. ఇప్పుడు రొమాంటిక్ మూడ్ లోకి మారిపోయి ‘సుంద‌ర‌కాండ‌’ అనే సినిమాలో న‌టించాడు. వెంక‌టేష్ నిమ్మ‌ల‌పూడి ద‌ర్శ‌కుడు. టీజ‌ర్ ఈరోజు విడుద‌లైంది

ఇదో రొమాంటిక్ ఎంట‌ర్‌టైన‌ర్. జుత్తుకు రంగేసుకొనే వ‌య‌సొచ్చినా, పెళ్లికాని ఓ యువ‌కుడి క‌థ ఇది. త‌న‌కు ఐదు ల‌క్ష‌ణాలున్న అమ్మాయి కావాలి అంటూ… వేట మొద‌లెడ‌తాడు. ఆ ఐదు ల‌క్ష‌ణాలేంటి? అలాంటి అమ్మాయి దొరికిందా, లేదా? అనే అంశాల చుట్టూ ఈ క‌థ న‌డుస్తుంది. కామెడీకి మంచి స్కోప్ ఉన్న క‌థ‌లా క‌నిపిస్తోంది. స‌త్య‌, అభిన‌వ్ గోమ‌టం, న‌రేష్‌, ర‌ఘుబాబు లాంటి హాస్య‌న‌టులు, వాళ్ల టైమింగ్ ఈ సినిమాకు ప్ల‌స్ పాయింట్ కానుంది. రోహిత్ లుక్ కూడా బాగుంది. ఈ సినిమా కోసం కొంత స్లిమ్ అయిన‌ట్టు క‌నిపిస్తోంది. బ్యాక్ గ్రౌండ్ స్కోర్‌, తెలుగులో వినిపిస్తున్న రాప్‌… ఆక‌ట్టుకొనేలా ఉంది. రొమాంటిక్ ఎంట‌ర్‌టైన‌ర్ల‌కంటూ సెప‌రేట్ ఫ్యాన్ బేస్ ఉంది. ఈ జోన‌ర్‌లో సినిమా వ‌చ్చి కూడా చాలాకాల‌మైంది. మొత్తానికి నారా రోహిత్ ఇప్పుడు రైట్ ట్రాక్ లో ప‌డిన‌ట్టు క‌నిపిస్తోంది. టీజ‌ర్ పాస్ అయిపోయింది. మ‌రి సినిమా ఎలా ఉంటుందో చూడాలి.