నితిన్‌కి ల‌వ్ స్టోరీలు బాగుంటాయి. ఫ‌న్ క్యారెక్ట‌ర్లు త‌న‌పై బాగా పండుతాయి. నితిన్ హిట్ సినిమాల్ని ఒక్క‌సారి ప‌రిశీలిస్తే ఈ విష‌యం అర్థం అవుతుంది. మాస్ ని మెప్పించాల‌ని నితిన్ చేసిన ప్ర‌య‌త్నాలేవీ నెర‌వేర‌లేదు. ఇటీవ‌ల అస‌లు మాస్ జోలికే పోలేదు. నితిన్ కెరీర్‌లో బిగ్గెస్ట్ హిట్ గా నిలిచిన `భీష్మ‌` ప‌క్కా ఎంట‌ర్‌టైన‌రే. అయితే ఇప్పుడు నితిన్ మ‌ళ్లీ మాస్ బాట ప‌ట్టాడు. వ‌క్కంతం వంశీతో నితిన్ ఓ సినిమా చేయ‌బోతున్నాడు. ఠాగూర్ మ‌ధు నిర్మాత‌. ఈ సినిమా మాస్ జోన‌ర్ లో సాగుతుంద‌ని స‌మాచారం. యాక్ష‌న్ కి పెద్ద పీట వేస్తున్నార్ట‌. కిక్‌, రేసుగుర్రం లాంటి చిత్రాల‌కు ప‌నిచేశాడు వ‌క్కంతం వంశీ. ఆ ఫ్లేవ‌ర్ తో సాగే క‌థ ఇద‌ని, నితిన్ పై భారీ ఎత్తున యాక్ష‌న్ స‌న్నివేశాలు ఉండ‌బోతున్నాయ‌ని స‌మాచారం. వ‌క్కంతం వంశీ క‌థ‌ల్లో స్క్రీన్ ప్లే మ్యాజిక్ ఉంటుంది. అలాంటి మ్యాజిక్‌… ఈ సినిమాలోనూ క‌నిపించ‌బోతోంద‌ట‌. క‌థ ఎప్పుడో రెడీ అయిపోయింది. ప్ర‌స్తుతం హీరోయిన్ కోసం అన్వేషిస్తున్నారు. ఫిబ్ర‌వ‌రిలో ఈ సినిమా సెట్స్‌పైకి వెళ్ల‌బోతోంది.