మాస్ డైరెక్ట‌ర్ల లిస్టులో త‌న‌కంటూ ఓ స్థానం సృష్టించుకొన్నాడు బోయ‌పాటి శ్రీ‌ను. టాప్ డైరెక్ట‌ర్ల‌లో త‌ను కూడా ఒక‌డు. బోయ‌పాటి పారితోషికం దాదాపు ప‌ది కోట్ల‌కు అటూ ఇటుగా ఉంది. ప్ర‌స్తుతం బెల్లం కొండ శ్రీ‌నివాస్ తో ఓ సినిమా చేస్తున్నాడు. అది పూర్తి కావొచ్చింది. ఆ త‌ర‌వాత బోయ‌పాటి శ్రీ‌ను. నాగ‌చైత‌న్య కాంబో సెట్ అవ్వ‌బోతోంద‌న్న టాక్స్ వినిపిస్తున్నాయి. ఈ సినిమా కోసం బోయ‌పాటి కి రూ.12 కోట్ల పారితోషికాన్ని ఆఫ‌ర్ చేశార‌ని, దాంతో చైతూతో సినిమా చేయ‌డానికి బోయ‌పాటి కూడా రెడీ అయిపోయాడ‌ని వార్త‌లొస్తున్నాయి. అయితే… ఈ వార్త‌ల్ని బోయ‌పాటి శ్రీ‌ను స‌న్నిహితులు ఖండిస్తున్నారు. ”చైతూతో సినిమా అనే విష‌యంలో ఎలాంటి నిజం లేదు.. అవ‌న్నీ గాలివార్త‌లే” అంటున్నారు. బోయ‌పాటి త‌దుప‌రి సినిమా క‌చ్చితంగా ఓ అగ్ర క‌థానాయ‌కుడితోనే ఉండ‌బోతోంద‌ని తెలుస్తోంది. ఆ స్టార్ హీరో ఎవ‌రన్న‌ది త్వ‌ర‌లో తెలుస్తోంది. బోయ‌పాటి లిస్టులో చిరంజీవి, బాల‌కృష్ణ‌, మ‌హేష్ బాబు ఇలాంటి హేమా హేమీల పేర్లు వినిపిస్తున్నాయి. క‌థ ఎవ‌రితో సెట్ అయితే వాళ్ల‌తోనే సినిమా. చైతూతో సినిమా అనే ఆలోచ‌న ప్ర‌స్తుతం బోయ‌పాటికి లేన‌ట్టే.