సాధార‌ణంగా వేస‌వి రాగానే, హీరోలంతా వెకేష‌న్ మూడ్‌లో ఉంటారు. కొంత‌మంది హీరోలు అప్పుడే… విహార యాత్ర‌ల్ని ప్లాన్ చేసేసుకొన్నారు. కానీ ఈ వేస‌విలో ఎన్టీఆర్ రెస్ట్ తీసుకోవ‌డం లేదు. త‌న ‘దేవర’ సినిమాని వీలైనంత త్వ‌ర‌గా ముగించాల‌న్న తొంద‌ర‌లో ఉన్నాడు. అందుకే ఫోక‌స్ అంతా ఈ సినిమాపై పెట్టాడు. ఎన్టీఆర్ – కొర‌టాల శివ కాంబినేష‌న్‌లో ‘దేవర’ రూపొందుతున్న సంగతి తెలిసిందే. ఈ సినిమాతోనే జాన్వీ క‌పూర్ టాలీవుడ్‌లోకి అడుగు పెడుతోంది. ఈ సినిమాకు సంబంధించిన షూటింగ్ చ‌క చ‌క సాగుతోంది. హైద‌రాబాద్‌లో కీల‌క‌మైన స‌న్నివేశాల్ని చిత్రీక‌రిస్తున్నారు. యాక్ష‌న్ పార్ట్ దాదాపుగా పూర్తయ్యింది. ఈవారంలోనే చిత్ర‌బృందం గోవా వెళ్ల‌బోతోంది. అక్క‌డ ఎన్టీఆర్ – జాన్వీల‌పై ఓ పాట‌ని, కొన్ని కీల‌క స‌న్నివేశాల్ని తెర‌కెక్కిస్తారు. ఈ చిత్రాన్ని రెండు భాగాలుగా రూపొందిస్తున్న సంగతి తెలిసిందే. తొలి భాగం ద‌స‌రా కానుక‌గా అక్టోబ‌రు 10న విడుద‌ల చేయ‌నున్నారు. అనిరుథ్ ఈ చిత్రానికి సంగీతాన్ని స‌మ‌కూరుస్తున్నారు. ఇప్ప‌టికే అనిరుధ్ సార‌ధ్యంలో కొన్ని పాట‌ల్ని రికార్డ్ కూడా చేసేశారు. ఈ చిత్రంలో ఎన్టీఆర్ రెండు పాత్ర‌ల్లో క‌నిపించ‌నున్న‌ట్టు తెలుస్తోంది. ‘ఆర్.ఆర్.ఆర్’ త‌ర‌వాత ఎన్టీఆర్ చేస్తున్న సినిమా ఇది. దాంతో పాటు ‘జ‌న‌తా గ్యారేజ్‌’ కాంబో రిపీట్ అవుతోంది. దాంతో ఈ సినిమాపై భారీ అంచ‌నాలు నెల‌కొన్నాయి.
ఈ వేస‌వి.. ఎన్టీఆర్‌కు నో రెస్ట్!
