రెబ‌ల్ స్టార్ ఇంటి నుంచి వ‌చ్చిన ప్ర‌భాస్‌… పాన్ ఇండియా స్టార్ అవతారం ఎత్తి, త‌న ప్ర‌తాపం చూపిస్తున్నాడు ఇప్పుడు మ‌రో హీరో ముంద‌డుగు వేశాడు. త‌నే విరాట్ రాజ్‌. కృష్ణంరాజుకి దూర‌పు చుట్టం. ప్ర‌భాస్‌కు సోద‌రుడి వ‌రుస‌. త‌ను క‌థానాయ‌కుడిగా ‘గౌడ్ సాబ్‌’ అనే సినిమా ఈరోజు ప‌ట్టాలెక్కింది. కొరియోగ్రాఫ‌ర్‌గా పేరు తెచ్చుకొన్న గ‌ణేష్ మాస్ట‌ర్ ఈ చిత్రానికి ద‌ర్శ‌క‌త్వం వ‌హిస్తున్నారు. ప్ర‌భాస్ ‘రాజా సాబ్’ అనే సినిమా తీస్తున్న సంగ‌తి తెలిసిందే. ఇప్పుడు `గౌడ్ సాబ్‌` వ‌స్తోంది. అదీ మేట‌రు.

విరాట్ రాజ్ లుక్స్ బాగున్నాయి. ప్ర‌భాస్ లా.. హైట్ ఉన్నాడు. మాస్, యాక్ష‌న్ సినిమాల‌కు సెట్ అవుతాడు. ‘గౌడ్ సాబ్’ కూడా ఆ జోన‌ర్ క‌థే అనిపిస్తోంది. ఈరోజు ఉద‌యం హైద‌రాబాద్ లో ఈ చిత్రాన్ని లాంఛ‌నంగా ప్రారంభించారు. సుకుమార్ క్లాప్ కొట్టి, విరాట్ రాజ్‌ని ఆశీర్వ‌దించాడు. ప్ర‌భాస్ ఫ్యాన్స్ అండ‌దండ‌లు త‌న‌పై ఉంటాయ‌ని విరాట్ విశ్వ‌సిస్తున్నాడు. టాలెంట్ ఉంటే.. ఎవ‌రినైనా అంద‌లం ఎక్కించే ప‌రిశ్ర‌మ ఇది. మ‌రి విరాట్ ప్ర‌తిభ ఏమిటో తెలియాలంటే ‘గౌడ్ సాబ్’ రావాల్సిందే.