లారెన్స్ కు హార‌ర్ జోన‌ర్ బాగా క‌లిసొచ్చింది. ముఖ్యంగా గంగ‌, కాంచ‌న‌, కాంచ‌న 2, కాంచ‌న 3 మంచి హిట్లు. ఒక‌దాన్ని మించి మ‌రోటి వ‌సూళ్ల వ‌ర్షం కురిపించాయి. ఆ త‌ర‌వాత ఎందుకో హార‌ర్ సినిమాల‌కు బ్రేక్ ఇచ్చాడు లారెన్స్. నిజానికి హార‌ర్ జోన‌ర్ ఈమ‌ధ్య స‌రిగా వర్క‌వుట్ కావ‌డం లేదు. ప్రేక్ష‌కులు కూడా బోర్ ఫీల‌య్యారు. అందుకే లారెన్స్ దెయ్యం క‌థ‌ల‌కు గ్యాప్ ఇచ్చాడు. అయితే ఇప్పుడు ‘స్త్రీ 2’ బాలీవుడ్ లో క‌నీవినీ ఎరుగ‌ని మ్యాజిక్ చేసింది. వంద‌ల కోట్లు రాబ‌ట్టింది. హార‌ర్ జోన‌ర్‌కు ఇంకా గిరాకీ త‌గ్గ‌లేద‌ని నిరూపించింది. అందుకే ఇప్పుడు లారెన్స్ కూడా దెయ్యం క‌థ‌ల దుమ్ము దుల‌ప‌డానికి రెడీ అయ్యాడు. ‘కాంచ‌న 4’ స్క్రిప్టుని సెట్స్‌పైకి తీసుకెళ్ల‌డానికి సిద్ధ‌మ‌య్యాడు. ఈ చిత్రాన్ని గోల్డ్ మైన్ ప్రొడ‌క్ష‌న్స్‌ సంస్థ నిర్మించ‌నుంది. మనీష్ నిర్మాత‌.

త‌మిళ చిత్ర‌సీమ‌కు చెందిన ఓ స్టార్ హీరోయిన్ ఈ చిత్రంలో న‌టించే అవ‌కాశం ఉంది. ఆ క‌థానాయిక ఎవ‌ర‌న్న‌ది మ‌రి కొద్ది రోజుల్లో తేలిపోతుంది. ఇప్ప‌టి వ‌ర‌కూ హార‌ర్ సినిమా చేయ‌ని క‌థానాయిక అయితే కొత్త‌గా ఉంటుంద‌ని లారెన్స్ భావిస్తున్నాడు. వ‌చ్చే నెల‌లో షూటింగ్ ప్రారంభ‌మ‌య్యే అవ‌కాశం ఉంది. 2025 చివ‌ర్లో విడుద‌ల చేస్తారు. లారెన్స్ క‌థానాయ‌కుడిగా ‘బెంజ్‌’ చిత్రీక‌ర‌ణ ద‌శ‌లో ఉంది. లోకేష్ క‌న‌గ‌రాజ్ ఈ చిత్రానికి క‌థ అందించ‌డం విశేషం.