కెరీర్‌ని బాగా మొద‌లెట్టి, మ‌ధ్య‌లో మిడిల్ డ్రాప్ అయిన హీరోల జాబితా తీస్తే అందులో రాజ్ త‌రుణ్ పేరు కూడా ఉంటుంది. ఉయ్యాల జంపాలా, కుమారి 21 ఎఫ్‌, సినిమా చూపిస్త మావ‌.. ఇలా వ‌రుస హిట్లు కొట్టాడు. అయితే ఆ త‌ర‌వాత ప‌రాజ‌యాలు వెన్నాడాయి. ఇప్పుడు ఓ హిట్ కోసం ప‌రిత‌పిస్తున్నాడు. అదృష్టం ఏమిటంటే.. త‌న‌కు సినిమాల‌కు కొద‌వ లేదు. ఎప్పుడూ ఏదో ఓ సినిమా చేస్తూనే ఉన్నాడు. ఆ ప‌రంప‌ర‌లో వ‌స్తున్న సినిమాల్లో `తిర‌గ‌బ‌డ‌రా సామి` ఒక‌టి. ఏ.ఎస్‌.ర‌వికుమార్ చౌద‌రి ద‌ర్శ‌క‌త్వం వ‌హించిన సినిమా ఇది. చిత్రీక‌ర‌ణ ఎప్పుడో పూర్తయ్యింది. ఓ మంచి రిలీజ్ డేట్ కోసం చిత్ర‌బృందం ఎదురు చూస్తోంది. ఇప్పుడు ట్రైల‌ర్ వ‌దిలారు.

ఏ.ఎస్‌.ర‌వికుమార్‌ది మాస్‌, యాక్ష‌న్ పంధా. రాజ్ త‌రుణ్ నీ అలాంటి క‌థ‌లోనే చూపించారు. హీరో కాస్త పిరికివాడు. చుట్టూ ఏం జ‌రుగుతున్నా `మ‌న‌కెందుకులే` అని లైట్ తీసుకొనే ర‌కం. హీరోయిన్ అలా కాదు. కాస్త వైలెంట్. ఫైట్లు కూడా చేస్తుంది. హీరోయిన్ వ‌ల్ల‌, హీరోకొచ్చిన తిప్ప‌లేమిటో, హీరో ఈ రౌడీయిజంపై ఎప్పుడు తిర‌గ‌బ‌డ‌తాడు? ఎలా ధైర్యం తెచ్చుకొంటాడ‌న్న‌ది క‌థ‌. ట్రైల‌ర్ లో యాక్ష‌న్ మోతాదు ఎక్కువ‌గానే క‌నిపించింది. ఇంత హెవీ యాక్ష‌న్ రాజ్ త‌రుణ్ ఇప్ప‌టి వ‌ర‌కూ చేయ‌లేదు. రాజ్ త‌రుణ్ లుక్ బాగుంది. కామెడీ గ్యాంగ్ కూడా కావ‌ల్సినంత ఉంది. మ‌రి ఈ సినిమాతోనైనా రాజ్ త‌రుణ్ జాత‌కం తిర‌గ‌బ‌డుతుందో, లేదో చూడాలి.