కామెడీ డైరెక్ట‌ర్ల‌ని చాలామందిని చూశాం కానీ… అనుదీప్ టైమింగే వేరు. త‌నే ఓ పెద్ద కమెడియ‌న్‌గా క‌నిపిస్తాడు. త‌న టైమింగ్ నీ, డైలాగ్ డెలివ‌రీనీ హీరోలు క్యాచ్ చేయ‌గ‌లిగితే చాలు. బోల్డంత కామెడీ పుట్టేస్తుంది. జాతిర‌త్నాల‌తో త‌న‌దైన ముద్ర వేసి, ప్రిన్స్ తో ఇంకో హిట్టు కొట్టిన అనుదీప్ ఇప్పుడు.. ర‌వితేజ‌తో ఓ సినిమా చేయ‌డానికి స‌మాయాత్తం అవుతున్న‌ట్టు టాలీవుడ్ టాక్‌. ర‌వితేజ కామెడీ టైమింగ్ గురించి ప్ర‌త్యేకంగా చెప్పాల్సిన ప‌నిలేదు. రవితేజ ఇచ్చే ఎక్స్‌ప్రెష‌న్స్ వ‌ల్ల‌, త‌న బాడీ లాంగ్వేజ్ వ‌ల్ల‌, సీన్‌లో విష‌యం లేక‌పోయినా పొట్ట చెక్క‌లైపోయిన సంద‌ర్భాలు కో కొల్ల‌లు. అలాంటిది.. ర‌వితేజ – అనుదీప్ క‌లిసి ఓ సినిమా చేస్తే ఎలా ఉంటుందో ఊహించుకోండి.

ఈ కాంబో దాదాపుగా సెట్ట‌యిపోయింద‌న్న‌ది ఇన్ సైడ్ వ‌ర్గాల టాక్‌. ఈ సినిమాలో ఇద్ద‌రు హీరోయిన్లు ఉంటార‌ని, త‌మ‌న్నా – త్రిష పేర్లు ప‌రిశీల‌న‌లో ఉన్నాయ‌ని తెలుస్తోంది. త‌మ‌న్నా, త్రిష‌… ఇద్ద‌రితోనూ ఇది వ‌ర‌కే సినిమాలు తీశాడు ర‌వితేజ‌. వాళ్ల‌ది హిట్ కాంబినేష‌నే. త్రిష ఓ తెలుగు సినిమా చేసి చాలా కాలం అయ్యింది. అందుకే.. ఆమె రాక కాస్త ఫ్రెష్ గా ఉంటుంది. ర‌వితేజ చేతిలో చాలా ప్రాజెక్టులు ఉన్నాయి. ప్ర‌స్తుతానికి టైగ‌ర్ నాగేశ్వ‌ర‌రావు సినిమాని పూర్తి చేసే ప‌నిలో ఉన్నాడు. అది పూర్త‌య్యాక ఈ సినిమా ఉండొచ్చు.