ప్ర‌భాస్ త‌న పుట్టిన రోజుకి స‌రైన గిఫ్టే అందించాడు. సాహో ఫ‌స్ట్ లుక్‌ని బ‌య‌ట పెట్టి.. అభిమానుల్ని అల‌రించాడు. ప్ర‌భాస్ పుట్టిన రోజుకి సాహో నుంచి త‌ప్ప‌కుండా ఏదో ఒక స‌ర్‌ప్రైజ్ ఉంటుంద‌ని భావిస్తూ వ‌చ్చింది చిత్ర‌సీమ‌. దానికి త‌గ్గ‌ట్టుగానే ఈ రోజు ఉద‌యం సరిగ్గా 9.గం.30 నిమిషాలకు సాహో ఫ‌స్ట్ లుక్ బ‌య‌ట‌కు వ‌చ్చేసింది. ప్ర‌భాస్ లాంగ్ సూట్‌లో, హాలీవుడ్ హీరోలానే క‌నిపిస్తున్నాడు. కాక‌పోతే.. ప్ర‌భాస్‌ని పూర్తిగా చూసే అవ‌కాశ‌మే రాలేదు. క‌ళ్లు మాత్ర‌మే క‌నిపించేలా ఈ ఫ‌స్ట్ లుక్ ని డిజైన్ చేశారు. చుట్టూ ఉన్న వాతావ‌ర‌ణం.. ఆ డిజైన్ చూస్తుంటే క‌చ్చితంగా ఈ సినిమా హాలీవుడ్ స్థాయిలోనే ఉండ‌బోతోంద‌న్న‌ది అర్థ‌మ‌వుతోంది. తెలుగు, త‌మిళ, హిందీ భాష‌ల్లో తెర‌కెక్కుతున్న ఈ చిత్రానికి రూ.150 కోట్ల పెట్టుబ‌డి పెడుతున్నారు. సుజిత్ ద‌ర్శ‌కుడు. శ్ర‌ద్దా క‌పూర్ క‌థానాయిక‌. శంక‌ర్ ఎహ్‌సాన్ రాయ్ సంగీతం అందిస్తున్నారు. సాహో మేకింగ్ వీడియో కూడా బ‌ట‌య‌కు వ‌చ్చే అవ‌కాశం ఉన్న‌ట్టు క‌నిపిస్తోంది. ప్ర‌భాస్ పుట్టిన రోజు సంబ‌రాలు ఆదివారం రాత్రి నుంచే మొద‌లైపోయాయి. త‌న స‌న్నిహితుల‌కు ఆదివారం రాత్రి మంచి పార్టీ ఇచ్చాడు. సోమ‌వారం మీడియాకు, బాహుబ‌లి టీమ్‌కీ, సాహో చిత్ర‌బృందానికీ ప్ర‌భాస్ పార్టీ ఇస్తున్నాడు.