పోలీస్ కథలు అనేసరికి తమిళ దర్శకుడు హరికి ఎక్కడ లేని పూనకం వచ్చేస్తుంది. పదిహేనేళ్ల క్రితం విక్రమ్ హీరోగా నటించిన ‘సామి’తో దర్శకుడిగా పరిచయమైన హరి, తరవాత సూర్య ‘సింగమ్’ సిరీస్‌తో ఫుల్ ఫేమస్ అయ్యారు. పోలీస్ కథలను, యాక్షన్ సినిమాలను తీయడంలో హరిది సపరేట్ స్టైల్. స్క్రీన్ మీద హీరో కంటే స్పీడుగా కెమెరా కదులుతుంది. హీరో యాక్షన్ అయితే హద్దులు దాటుతుంది. సూర్య ‘సింగమ్’, విశాల్ ‘పూజ’.. సినిమా ఏదైనా హరి మార్క్ టేకింగ్ కనిపిస్తుంది. ఆయన డైరెక్ట్ చేస్తున్న లేటెస్ట్ సినిమా ‘సామి స్క్వేర్’. దర్శకుడిగా పరిచయమైన ‘సామి’కి సీక్వెల్ ఇది. ఇందులోనూ విక్రమ్ హీరోగా నటిస్తున్నాడు. ఈ రోజు ఈ సినిమా ట్రైలర్ విడుదలైంది. విక్రమ్‌ని చూస్తున్నంత సేపూ సూర్య గుర్తుకు వస్తున్నాడు. ‘సింగమ్’ సినిమాలో సూర్య యాక్ట్ చేసినట్టు విక్రమ్ చేత హరి యాక్ట్ చేయించాడు. కొన్నేళ్లుగా డిఫరెంట్ సినిమాలు చేస్తున్న విక్రమ్, మాస్ కమర్షియల్ సినిమాలు చేసినా… వాటిలో ఏదో ఒక డిఫరెన్స్ వుండేలా చూసుకున్నాడు. ‘సామి స్క్వేర్’ విషయంలో మాత్రం హరికి ఫుల్ ఫ్రీడమ్ ఇచ్చినట్టున్నాడు. ఆయన ‘సింగమ్’ స్క్వేర్ టైపులో ట్రైలర్ కట్ చేసి వదిలాడు. అన్నట్టు… కీర్తీ సురేష్ కథానాయికగా నటిస్తున్న ఈ సినిమా తెలుగులోనూ విడుదల కానుంది.