రామ్ చ‌ర‌ణ్ – స‌ల్మాన్ ఖాన్ ఇద్ద‌రూ మంచి దోస్తుల‌న్న సంగ‌తి `గాడ్ ఫాదర్‌` సినిమాతో మ‌రోసారి తెలిసొచ్చింది. ఈ సినిమాలో అతిథి పాత్ర‌లో న‌టించ‌డానికి స‌ల్మాన్ ముందుకు రావ‌డం, అందుకోసం పారితోషికం కూడా వ‌ద్ద‌నుకోవ‌డం తెలిసిన విష‌యాలే. పారితోషికం ఇవ్వ‌క‌పోయినా.. స‌ల్మాన్‌కి ఓ భారీ బ‌హుమ‌తి ఇచ్చాడు చ‌ర‌ణ్‌. ఇప్పుడు రామ్ చ‌ర‌ణ్ కోసం స‌ల్మాన్ ఖాన్ క‌థ‌లు కూడా వింటున్నాడ‌ట‌.

ఆర్‌.ఆర్‌.ఆర్ త‌ర‌వాత చ‌రణ్‌కి కూడా బాలీవుడ్ వైపు మ‌న‌సు మ‌ళ్లింది. ఇది వ‌ర‌కు `జంజీర్‌` రీమేక్ తో బోల్తా ప‌డిన చ‌ర‌ణ్‌.. ఈసారి బాలీవుడ్ లో లెక్క స‌రి చేయాల‌నుకొంటున్నాడు. ఓ స్ట్ర‌యిట్ హిందీ సినిమా చేయాల‌న్న‌ది చ‌ర‌ణ్ ప్లాన్‌. బాలీవుడ్ ద‌ర్శ‌క నిర్మాత‌లు కూడా చ‌ర‌ణ్ అప్పాయింట్మెంట్ కోసం ఎదురు చూస్తున్నారు. చ‌ర‌ణ్‌కి ముంబైలో ప‌టిష్ట‌మైన పీఆర్ వ్య‌వస్థ లేదు. చ‌ర‌ణ్‌ని అక్క‌డ ఏ పెద్ద నిర్మాత‌, ద‌ర్శ‌కుడు క‌ల‌వాల‌న్నా… స‌ల్మాన్‌ని సంప్ర‌దిస్తున్నార్ట‌. స‌ల్మాన్ కూడా చ‌ర‌ణ్ కోసం క‌థ‌లు వింటున్నాడ‌ని, త‌న‌కు న‌చ్చిన క‌థ‌లు చ‌ర‌ణ్‌కి పంపుతున్నాడ‌ని ఇన్ సైడ్ వ‌ర్గాల టాక్‌. చ‌ర‌ణ్ కి బాలీవుడ్ లో సినిమా చేయాల‌ని ఉన్నా.. అది ఇప్ప‌ట్లో కుద‌ర‌ని విష‌యం. ఎందుకంటే.. శంక‌ర్ సినిమా లైన్ లో ఉంది. ఆ త‌ర‌వాత‌.. బుచ్చిబాబు సినిమా మొద‌లెట్టాలి. మ‌రోవైపు ప్ర‌శాంత్ నీల్ లాంటి ద‌ర్శ‌కులు కూడా చ‌ర‌ణ్ కోసం క‌థ‌లు సిద్ధం చేస్తున్నారు. వీటిలో ఏదైనా ప్రాజెక్టు డీలే అయితే మాత్రం… అప్పుడు బాలీవుడ్ సినిమా చేసే అవ‌కాశం ఉంది.