ఆర్‌.ఆర్‌.ఆర్ ఎప్పుడైతే వాయిదా ప‌డిందో, మిగిలిన సినిమాల‌కు గేట్లు ఎత్తేసిన‌ట్టైంది. `త‌ర‌వాత చూద్దాంలే` అనుకున్న సినిమాలు సైతం రిలీజ్ కి రెడీ అయిపోతున్నాయి. జ‌న‌వ‌రి 14న డీజే టిల్లు విడుద‌ల అవుతోంది. 15న `హీరో` వ‌స్తోంది. ఇప్పుడు మ‌రో మూడు చిత్రాలు సైతం విడుద‌ల‌కు సిద్ధ‌మ‌య్యాయి. మెగా అల్లుడు క‌ల్యాణ్ దేవ్ `సూప‌ర్ మ‌చ్చీ` జ‌న‌వ‌రి 14నే వ‌స్తోంది. ఎం.ఎస్ రాజు ద‌ర్శ‌క‌త్వం వ‌హించిన `7 డేస్‌.. 6 నైట్స్‌` కూడా ఈ సంక్రాంతికే విడుద‌ల చేస్తున్న‌ట్టు ప్ర‌క‌టించారు. దిల్ రాజు బ్యాన‌ర్‌లో రూపొందిన `రౌడీ బోయ్స్‌`ని సంక్రాంతికి దింపేస్తున్నారు. రానా న‌టించిన ద్విభాషా చిత్రం `1945` జ‌న‌వ‌రి 7న రాబోతోంది. వీటితో పాటు `బంగార్రాజు` కూడా ఈ సంక్రాంతికే వ‌స్తోంది. విడుద‌ల తేదీ అధికారికంగా ఇంకా ప్ర‌క‌టించ‌లేదు. ఈ సినిమాల‌న్నీ ఎప్పుడో రెడీ అయిపోయాయి. 2021లోనే రావాల్సింది. కానీ కుద‌ర్లేదు. సంక్రాంతి కీ స‌మ్మ‌ర్‌కీ మ‌ధ్య‌న రావాల్సిన ఈ చిత్రాల‌కు ఇప్పుడు మంచి త‌రుణం దొరికిన‌ట్టైంది. సినిమాలైతే వ‌స్తున్నాయి. కాక‌పోతే.. సంక్రాంతి పండ‌గ‌ని రెట్టింపు చేసే వినోదాలు దొరుకుతాయా? లేదా? అన్న‌దే డౌటు.