సంక్రాంతి రేసు నుంచి ఎప్పుడైతే ఆర్‌.ఆర్‌.ఆర్ త‌ప్పుకుందో, మిగిలిన సినిమాల‌కు ఊపొచ్చింది. వ‌రుస‌గా కొత్త సినిమాల రిలీజ్‌డేట్లు వ‌చ్చేస్తున్నాయి. అంద‌రి గురీ సంక్రాంతిపైనే. ఈ రెండు రోజుల్లో దాదాపు అర‌డ‌జ‌ను సినిమాలు సంక్రాంతి బ‌రిలో ఉన్న‌ట్టు ప్ర‌క‌టించుకున్నాయి. ఇప్పుడు రాజ‌శేఖ‌ర్ కూడా `నేను సైతం` అంటున్నాడు. రాజ‌శేఖ‌ర్ క‌థానాయ‌కుడిగా `శేఖ‌ర్‌` అనే చిత్రం రూపుదిద్దుకుంది. జీవితా రాజ‌శేఖ‌ర్ ద‌ర్శ‌కురాలు. ఈ సినిమా టీజ‌ర్ ఇటీవ‌లే విడుద‌లైంది. అందులో రాజ‌శేఖ‌ర్ గెట‌ప్‌.. కొత్త‌గా క‌నిపించింది. టీజ‌ర్ కూడా ఆక‌ట్టుకుంది. ఈ సినిమాకి ఓటీటీ నుంచి క్రేజీ ఆఫ‌ర్లు వ‌చ్చాయని, రూ.25 కోట్ల‌కు ఓ సంస్థ బేర‌మాడింద‌ని వార్త‌లొచ్చాయి. అయితే రాజ‌శేఖ‌ర్ మాత్రం ఈ సినిమాని థియేట‌ర్ల‌లోనే విడుద‌ల చేయాల‌ని ఫిక్స‌య్యారు. ఇప్పుడు సంక్రాంతి బ‌రిలో త‌న సినిమాని తీసుకురావ‌డానికి ప్ర‌య‌త్నాలు మొద‌ల‌య్యాయి. సినిమా షూటింగ్ పూర్త‌యి, ఫ‌స్ట్ కాపీ చేతిలో ఉంది. అందుకే… రిలీజ్ చేయ‌డానికి ధైర్యం చేస్తున్నారు. జ‌న‌వ‌రి 12న భీమ్లా నాయ‌క్ రావాల్సివుంది. కానీ రాధే శ్యామ్, ఆర్‌.ఆర్.ఆర్ ల‌కు దారి ఇవ్వాల‌న్న ఉద్దేశ్యంతో.. భీమ్లా నాయ‌క్ వెన‌క్కి వెళ్లాడు. ఆ డేట్ పై ఇప్పుడు రాజ‌శేఖ‌ర్ గురి పెట్టిన‌ట్టు స‌మాచారం. ఒక‌ట్రెండు రోజుల్లో ఈ సినిమా విడుద‌ల‌పై అధికారిక ప్ర‌క‌ట‌న వ‌స్తుంది.