ఆడాళ్లూ మీకు జోహార్లూ.. సినిమాపై ముందునుంచీ మంచి బ‌జ్ ఉంది. టీజ‌ర్‌, పాట‌లు, ట్రైల‌ర్‌తో అది ఇంకాస్త ఎక్కువైంది. ల‌క్కీ ఛార్మ్ ర‌ష్మిక తోడ‌వ్వ‌డంతో… ఆడాళ్లు క్రేజ్ పెరిగింది. దానికి త‌గిన‌ట్టే బిజినెస్ కూడా ఓ రేంజ్‌లో జ‌రిగింది. ఈ సినిమాపై కూడా శ‌ర్వా చాలా కాన్ఫిడెంట్ గా ఉన్నాడు. ప్రీ రిలీజ్ ఫంక్ష‌న్‌లో అది క‌నిపించింది. ”ఈ సినిమా నా కెరీర్ లో ది బెస్ట్ ఫిల్మ్‌గా మిగిలిపోతుంది.. రాసిపెట్టుకోండి” అంటూ ఓపెన్ స్టేట్‌మెంట్ ఇచ్చేశాడు శ‌ర్వా. ఈమ‌ధ్య కాలంలో సీరియ‌స్ సినిమాలే చేస్తున్నాడ‌న్న‌ది శ‌ర్వాపై కంప్లైంట్‌. ఈ విష‌యాన్ని శ‌ర్వా కూడా ఒప్పుకున్నాడు. ”నా బ‌లం ఫ్యామిలీ ఎలిమెంట్స్‌. అది ఈ సినిమాలో అడుగడుగునా క‌నిపిస్తాయి. అందుకే ఈ సినిమాపై నాకు అంత న‌మ్మ‌కం కుదిరింద‌”న్నాడు శ‌ర్వా. ఈ ప్రీ రిలీజ్ ఫంక్ష‌న్‌కి అతిథిగా వ‌చ్చిన సుకుమార్ సైతం ఇదే మాట అన్నాడు. శ‌ర్వా బ‌లం కామెడీ సినిమాల‌ని, అయితే. త‌ను ఈ మ‌ధ్య చాలా సీరియ‌స్ సినిమాలు చేస్త‌న్నాడ‌ని, ఈ సినిమాలో మాత్రం పాత శ‌ర్వా క‌నిపిస్తున్నాడ‌ని సుకుమార్ చెప్పాడు. ”దేవిశ్రీ జ‌డ్జ్‌మెంట్ అంటే నాకు గురి ఎక్కువ‌. బాగా నచ్చితే గానీ ఏ సినిమా గురించీ పెద్ద‌గా మాట్లాడ‌డు. కానీ ఈ సినిమా చూశాక మాత్రం.. సూప‌ర్ హిట్ అవుతుంద‌న్నాడు. కాబ‌ట్టి.. ఇది సూప‌ర్ హిట్టే” అని జోస్యం చెప్పాడు సుకుమార్‌.