శ‌ర్వానంద్ కు ఎందుకో క్లాస్, ఫీల్ గుడ్‌, ల‌వ్ స్టోరీలు బాగా న‌ప్పుతాయి. ఫ్యామిలీ అంతా క‌లిసి చూసేలా త‌న సినిమా ఉండాల‌ని అనుకొంటాడు. అలాంటి క‌థ‌లే ఎంచుకొంటాడు. ‘మ‌న‌మే’ ట్రైల‌ర్ చూశాక‌… మ‌రోసారి శ‌ర్వా త‌న‌దైన బ‌లాన్నే న‌మ్ముకొన్న‌ట్టు అనిపిస్తుంది. శ్రీ‌రామ్ ఆదిత్య ద‌ర్శ‌క‌త్వం వ‌హించిన సినిమా ఇది. కృతి శెట్టి క‌థానాయిక‌. పీపుల్ మీడియా ఫ్యాక్ట‌రీ నిర్మించింది. ఈనెల 7న విడుద‌ల అవుతోంది. ఇప్పుడు ట్రైల‌ర్ రిలీజ్ చేశారు.

ట్రైల‌ర్ హాయిగా, క‌ల‌ర్‌ఫుల్ గా సాగిపోయింది. ఓ హీరో.. హీరోయిన్‌.. మ‌ధ్య‌లో బుడ‌త‌డు. ఇదే స్టోరీ. వీరిద్ద‌రికీ ఆ బాబుకీ ఉన్న సంబంధం ఏమిటన్న‌దే ఈ క‌థ‌. అయితే క‌థ‌లో కాన్‌ఫ్లిక్ట్ ట్రైల‌ర్‌లో క‌నిపించ‌లేదు. బ‌హుశా.. స్క్రీన్ పై చూసి, తెలుసుకొంటేనే మ‌జా వ‌స్తుంద‌ని ద‌ర్శ‌క నిర్మాత‌లు ఆశించారేమో. శ‌ర్వా అందంగా ఉన్నాడు. స్లిమ్ అయ్యాడు. ర‌న్ రాజా ర‌న్ లా.. ఈ సినిమాలో కామెడీ టైమింగ్ అద‌ర‌గొట్టిన‌ట్టు క‌నిపిస్తోంది. త‌న కాస్ట్యూమ్స్ కూడా ట్రెండీగా ఉన్నాయి. కృతి చాలా రోజుల త‌ర‌వాత గ్లామ‌రెస్‌గా క‌నిపించింది. ప‌ద్ధ‌తిగా ఉంటూనే ఆక‌ట్టుకొంది. కొంత మెచ్యూరిటీ ఉన్న పాత్ర‌లా అనిపించింది. విజువ‌ల్స్‌, బ్యాక్ గ్రౌండ్ స్కోర్ క్లాసీగా ఉన్నాయి. ఫ్యామిలీ అంతా క‌లిసి థియేట‌ర్ల‌కు వెళ్ల‌ద‌గిన సినిమా వ‌చ్చి చాలా కాల‌మైంది. ఆ లోటు ‘మ‌న‌మే’ తీర్చ‌బోతున్న‌ట్టు అనిపిస్తోంది.