‘సైరా’పై మెగా అభిమానులు చాలా ఆశ‌లున్నాయి. దాదాపుగా 200 కోట్ల బ‌డ్జెట్‌తో రూపొందుతున్న చిత్ర‌మిది. తొమ్మిదేళ్ల త‌ర‌వాత రీ ఎంట్రీ ఇచ్చిన సినిమాతోనే 150 కోట్లు కొల్ల‌గొట్టాడు చిరు. ‘సైరా’ 200 కోట్ల‌కు మించి వ‌సూలు చేస్తుంద‌ని చిత్ర‌బృందం న‌మ్ముతోంది. పైగా ఈ సినిమాలో స్టార్ల‌కు ఏమాత్రం కొద‌వ‌లేదు. న‌య‌న‌తార, త‌మ‌న్నా, అమితాబ్‌బ‌చ్చ‌న్‌, విజ‌య్‌సేతుప‌తి, జ‌గ‌ప‌తిబాబు… ఇలా చాలామంది స్టార్లు క‌నిపించ‌నున్నారు. అయితే చిరంజీవి త‌ర‌వాత… అంత శ‌క్తిమంత‌మైన పాత్ర‌లో క‌నిపించేది సుదీప్ అని, సుదీప్ న‌ట‌న.. ఈ చిత్రానికి ప్ర‌ధాన ఆక‌ర్ష‌ణ‌గా నిల‌వ‌బోతోంద‌ని స‌మాచారం అందుతోంది.
‘ఈగ’ త‌ర‌వాత ‘బాహుబ‌లి’లోనే సుదీప్ కనిపించాడు. ఈమ‌ధ్య త‌న‌కు చాలా అవ‌కాశాలొచ్చాయి. కానీ దేన్నీ ఒప్పుకోలేదు. ‘సైరా’లో మాత్రం చాలా శ‌క్తిమంత‌మైన పాత్ర ద‌క్కింద‌ట. అందులో… సుదీప్ విజృంభించాడ‌ని, చిరంజీవి – సుదీప్ మ‌ధ్య వ‌చ్చిన స‌న్నివేశాలు హైలెట్‌గా నిలుస్తాయ‌ని తెలుస్తోంది. క‌న్న‌డ‌లో సుదీప్‌కి మంచి మార్కెట్ ఉంది. `సైరా`ని క‌న్న‌డ‌లో విడుద‌ల చేస్తే… సుదీప్ అభిమానుల వ‌ల్ల వ‌సూళ్లు పెరిగే ఛాన్స్ ఉంది. ఓ విధంగా సుదీప్ మార్కెట్ ప‌రంగానూ `సైరా`కి ప్ల‌స్ అవ్వ‌బోతున్నాడ‌న్న‌మాట.
