డిసెంబ‌రు 2న విడుదల అవుతున్న హిట్ 2 ప్ర‌మోష‌న్లు ఓ రేంజ్‌లో సాగుతున్నాయి. ప్రీ రిలీజ్ ఫంక్ష‌న్ కి రాజ‌మౌళి రావ‌డంతో.. హిట్ 2కి మ‌రింత కిక్ వ‌చ్చింది. ఈ సినిమా ట్రైల‌ర్ కూడా బాగా క‌ట్ చేశారు. ట్రైల‌ర్ లో విల‌న్ ఎవ‌రో క‌నిపించ‌కుండా జాగ్ర‌త్త ప‌డ్డారు. ఈ సినిమాలో మెయిన్ ట్విస్ట్ అదే. హంత‌కుడు ఎవ‌రో అన్వేషిస్తూ సాగే క‌థ ఇది. సస్పెన్స్‌ థ్రిల్ల‌ర్ చిత్రాల్లో ఓ కామ‌న్ పాయింట్ ఉంటుంది. హంతకుడు ఎవ‌రో తెలియ‌న‌ప్పుడు.. సినిమాలోని ప్ర‌ధాన పాత్ర‌ధారులంద‌రిపైనా అనుమానాలు రేకెత్తేలా సీన్లు డిజైన్ చేస్తుంటారు. ఆ త‌ర‌వాత అస‌లు హంత‌కుడు బ‌య‌ట‌కు వ‌స్తాడు. `హిట్ 2` ఫార్మెట్ కూడా అదే. ఓద‌శ‌లో.. అడ‌విశేష్ పైనా అనుమానాలు రేగుతాయ‌ని, త‌నే విల‌న్ అనుకొనే ప‌రిస్థితి వ‌స్తుంద‌ని… అయితే అడ‌విశేష్ హీరోనా, విల‌నా? అనేది క్లైమాక్స్ లో రివీల్ అవుతుంద‌ని తెలుస్తోంది. ఈ సినిమా ట్విస్ట్…. ఈ క‌థ‌కు ఆయువు పట్టు. అందుకే సినిమా చూసిన‌వాళ్లెవ‌రూ ఆ ట్విస్ట్ బ‌య‌ట‌కు రివీల్ చేయొద్దు.. అంటూ చిత్ర‌బృందం ప్రేక్ష‌కుల్ని కోరుతోంది. ఈ సినిమాలో ఇంకో ట్విస్ట్ కూడా ఉంది. హిట్ 3 హీరోని ఈ సినిమా క్లైమాక్స్‌లో రివీల్ చేయ‌బోతున్నార్ట‌. అది కూడా ఈ సినిమాపై ఆస‌క్తిని పెంచే ఎలిమెంటే.! హీరోని ఎలాగూ రివీల్ చేస్తారు కాబ‌ట్టి.. హిట్ 2 ఫ‌లితం ఎలా ఉన్నా… హిట్ 3 ప‌ట్టాలెక్క‌డం ఖాయం.