అల్లూరి సీతారామ‌రాజు సినిమా గుర్తింది క‌దా? అందులో అల్లూరి సీతారామ‌రాజు బ్రిటీష్ వారి బుల్లెట్ల వ‌ర్షంలో తుడ‌స్తూ… భారీ డైలాగ్ చెబుతాడు. అల్లూరి సీతారామ‌రాజు అన‌గానే గుర్తొచ్చే డైలాగే అది. ఆ డైలాగ్‌కి ప్ర‌తి భారతీయుడి రోమాలూ నిక్క‌బొడుస్తాయి. అల్లూరిలోని దేశ‌భ‌క్తి ని దివిటీలా నిలిచిన సీన్ అది. అచ్చం అలాంటి స‌న్నివేశ‌మే `సైరా`లో కూడా చూడ‌బోతున్నాం. బ్రిటీష్ వారిపై పోరాడిన తొలి త‌రం యోధుడు సైరా. కొన్నేళ్ల పాటు బ్రిటీష్ వారిని గ‌డ‌గ‌డ‌లాడించాడు. చివ‌రికి బ్రిటీష్ ప్ర‌భుత్వం సైరాకి ఉరిశిక్ష విధించింది. ఉరిశిక్ష స‌మ‌యంలో.. బ్రిటీష్ వారిని ఉద్దేశించి సైరాతో కొన్ని డైలాగులు చెప్పించారు. ఆ డైలాగుల‌కు థియేట‌ర్లు ద‌ద్ద‌రిల్లిపోవ‌డం ఖాయ‌మ‌ని తెలుస్తోంది. దాదాపు 2 పేజీల నిడివి ఉన్న డైలాగ్‌ని చిరంజీవి అన‌ర్గ‌ళంగా ప‌లికాడ‌ట‌. బుర్రా సాయిమాధ‌వ్ క‌లం నుంచి జాలువారిన సంభాష‌ణ‌లు బుల్లెట్ల కంటే వేగంగా దూసుకుపోతాయ‌ని, మొత్తం సినిమాకే క్లైమాక్స్ హైలెట్‌గా నిల‌వ‌బోతోంద‌ని తెలుస్తోంది. ఇప్ప‌టికే ఈ క్లైమాక్స్ చిత్రీక‌ర‌ణ కూడా పూర్త‌యింది. మ‌ర‌ణం ముందు కూడా.. త‌న ధీర‌త్వం విడిచిపెట్ట‌ని సైరా చెప్పే ఆ డైలాగులు వినాలంటే.. ఇంకొంత కాలం ఆగాలి.