ఐదేళ్ల తర్వాత వెండితెరమీద కనిపించబోతున్న ఐశ్వర్యారాయ్ ఇప్పుడు గాల్లో తేలినట్టుందట. జజ్బా సినిమా ఆమె నటనా విశ్వరూపం చూసి తీరాల్సిందేనట. సీరియస్ డ్రామా బ్యాక్ డ్రాప్ లో తీసిన ఈ సినిమా ఈ నెల 9న విడుదలవుతుంది. ఈలోగా సినిమా ప్రమోషన్ కోసం ఐశ్వర్యతో పాటు సినిమా యూనిట్ తెగ కష్టపడుతున్నారు. ఇర్ఫాన్ ఖాన్, షబానా ఆజ్మీ ముఖ్యపాత్రల్లో నటించిన ఈ సినిమాకు ఆరుగు నిర్మాతలు. సంజయ్ గుప్తా సహ నిర్మాతే కాకుండా దర్శకత్వం వహించారు. దక్షిణ కొరియా సినిమా 7 డేస్ కు ఇది రీమేక్ అని సమాచారం. టీవీ ఎంటర్ టైన్ మెంట్ షోలలో, ఆన్ లైన్లో, సోషల్ మీడియాలో జజ్బా ప్రమోషన్ జోరుగా జరుగుతోంది. కామెడీ నైట్స్ విత్ కపిల్ కార్యక్రమంలో ఐశ్వర్యారాయ్ ఫుల్ ఎనర్జీతో ఆడియన్స్ ను సమ్మోహనపర్చింది. కామెడీ నైట్స్ స్టేజిని ఏలుకుందంటే అతిశయోక్తి కాదు. జోకులు, సెటైర్లు, కపిల్ తో పాటు ఇతరులతో పాటు ఆటపాటలతో ఐశ్వర్య పర్సన్ ఆఫ్ ది డే అయింది.
ఆకుప్చ్చ రంగు డ్రెస్సులో ఒకప్పటి వన్నె తరగని హీరోయిన్ గా ప్రత్యక్షమైన ఐశ్వర్యను చూసి అభిమానులు మెస్మరైజ్ అయ్యారట. ఆమె చిరునవ్వుపవర్ అలాగే ఉంది. ఎనర్జీ కూడా ఏమాత్రం తగ్గలేదు. జోకులతో పాటు స్టెప్పులు వేస్తూ సెట్ లో సందడి చేసింది. జజ్బా సక్సెస్ పై పూర్తి నమ్మకముందంటోంది ఐశ్వర్య. ఇన్నేళ్ల తర్వాత వస్తున్న కొత్త సినిమాలో, కెరీర్ లో తొలి సినిమా అనే స్థాయిలో కష్టపడి అద్భుతంగా నటించిందని యూనిట్ వారు తెగ పొగుడుతున్నారు. ఇంతకీ ఐశ్వర్య నట విశ్వరూపం ఏ స్థాయిలో ఉంటుందో చూడాలంటే ఈనెల 9 వరకూ వేచిచూడాల్సిందే.
