‘గుంటూరు కారం’ త‌ర‌వాత త్రివిక్రమ్ కొత్త సినిమా క‌బురు ఏం వినిపించ‌లేదు. అల్లు అర్జున్‌తో ఓ సినిమా చేయాలి. కానీ ‘పుష్ష 2’తో వ‌చ్చిన క్లాష్ వల్ల అది సాధ్యం కాలేదు. రామ్ తో ఓ సినిమా చేయ‌బోతున్నాడ‌ని, వెంకీ – నానిల‌తో మ‌ల్టీస్టార‌ర్ చేస్తాడ‌ని ఇలా ర‌క‌ర‌కాల వార్త‌లు బ‌య‌ట‌కు వ‌చ్చాయి. కానీ దేనిపైనా ఓ స్ప‌ష్ట‌త లేదు. చివ‌రికి మ‌ళ్లీ బంతి… బ‌న్నీ ద‌గ్గ‌రే ఆగింది.
Also Read : మ‌రీ ఇంత వెయిటింగ్ ఏమిటి త్రివిక్రమ్..?!
బ‌న్నీతో త్రివిక్రమ్ సినిమా ఫిక్స‌యిపోయింది. కాక‌పోతే… ఈ సినిమా ఎప్పుడు ప‌ట్టాలెక్కుతుంద‌న్న‌దే అంద‌రిలోనూ ఉద‌యిస్తున్న ప్ర‌శ్న. వ‌చ్చే నెల‌లో ఈ చిత్రానికి క్లాప్ కొట్టే అవ‌కాశాలు ఉన్నాయ‌ని ఇన్ సైడ్ వ‌ర్గాల టాక్‌. సెప్టెంబ‌రు నుంచి చిత్రీక‌ర‌ణ మొద‌లెట్ట‌బోతున్నార‌ని తెలుస్తోంది. సెప్టెంబ‌రు నాటికి ‘పుష్ష 2’ ప‌నులు కూడా పూర్త‌వుతాయి. కాబ‌ట్టి… త్రివిక్ర‌మ్‌కి డేట్లు కేటాయించొచ్చు. ఈలోగా క‌థానాయిక కోసం త్రివిక్రమ్ అన్వేష‌ణ మొద‌లుపెట్టార‌ని తెలుస్తోంది. బ‌న్నీ ప‌క్క‌న జాన్వీ క‌పూర్‌ని క‌థానాయిక‌గా తీసుకోవాల‌ని త్రివిక్రమ్ ప్లాన్‌. అయితే ‘పుష్ష 2’లో జాన్వీ ఐటెమ్ గీతం చేసే అవ‌కాశం ఉంది. ఒక‌వేళ ‘పుష్ష 2’లో జాన్వీ ఐటెమ్ పాట చేసేస్తే.. మ‌రో క‌థానాయిని తీసుకొంటారు. జాన్వీ ఐటెమ్ గ‌నుక చేయ‌క‌పోతే.. త్రివిక్రమ్ సినిమాలో బ‌న్నీ ప‌క్క‌న జాన్వీని తీసుకొంటారు. ఈలోగా ‘దేవర’ కూడా వ‌చ్చేస్తుంది కాబ‌ట్టి ‘దేవర’లో జాన్వీ పెర్‌ఫార్మ్సెన్స్‌, ఆమెకొచ్చిన ఆద‌ర‌ణ ఇవ‌న్నీ దృష్టిలో ఉంచుకొనే అవ‌కాశం ఉంది. త్వ‌ర‌లోనే ఈ కాంబోకి సంబంధించిన ఓ అధికారిక ప్ర‌క‌ట‌న విడుద‌ల చేయ‌డానికి చిత్ర‌బృందం క‌స‌ర‌త్తులు చేస్తోంది.
