పోస్టర్ మీద పేరు చదివితే తప్ప ఇందులో వున్నది పంజా వైష్ణవ తేజ్ అని గుర్తించడం కష్టమే. లేదంటే ఎవరైనా ‘రంగస్థలం’లో రామ్ చరణ్ అనుకోవడం ఖాయమే. చూపులకు పోస్టర్ అలాగే వుంది మరి. మెగా మేనల్లుడు, సాయిధరమ్ తేజ్ తమ్ముడు వైష్ణప్ తేజ్ కథానాయకుడిగా పరిచయమవుతున్న సినిమాపై ‘రంగస్థలం’ ప్రభావం ఎక్కువ వున్నట్టుంది. ‘రంగస్థలం’ సినిమా ప్రారంభోత్సవానికి ముందు ఎలాంటి పోస్టర్ విడుదల చేశారో… డిట్టో ఈసారీ అలాంటి పోస్టర్ ఒకటి విడుదల చేశారు. హీరోను వెనుక నుంచి చూపించారు. ‘రంగస్థలం’లో రామ్ చరణ్ కావిడ మోస్తే… ఇందులో పంజా వైష్ణవ్ తేజ్ సముద్రం ఒడ్డున పడవ పక్కన వున్నాడు. ఒక్క దర్శకుడు, ఒక్క సినిమాటోగ్రాఫర్ తప్ప ‘రంగస్థలం’ సినిమాకు పనిచేసిన టీమ్ అంతా ఈ సినిమాకు పని చేస్తున్నారు. ‘రంగస్థలం’ దర్శకుడు సుకుమార్ ఈ సినిమా నిర్మాణంలో ఓ భాగస్వామి. ఆయన శిష్యుడు సానా బుచ్చిబాబు దర్శకుడిగా పరిచయం అవుతున్నాడు. మరికొన్ని గంటల్లో ఈ సినిమా ప్రారంభం కానుంది.