ఆగ‌స్టు 22 వ‌స్తుంద‌న‌గానే చిరంజీవి అభిమానులు అలెర్ట్ అయిపోతారు. ఎందుకంటే చిరంజీవి పుట్టిన రోజు అది. ఆ రోజున చిరు కొత్త సినిమాల సంగ‌తులు, టీజ‌ర్లు, పోస్ట‌ర్లు బ‌య‌ట‌కు వ‌స్తాయి. ఈసారి చిరంజీవి నుంచి ‘విశ్వంభ‌ర‌’ టీజ‌ర్ రాబోతోంది. వ‌శిష్ట ద‌ర్శ‌క‌త్వంలో యూవీ క్రియేష‌న్స్ నిర్మిస్తున్న చిత్ర‌మిది. ఆగ‌స్టు 22న టీజ‌ర్ విడుద‌ల చేస్తున్నారు. టీజ‌ర్ క‌ట్ ఇప్ప‌టికే పూర్త‌య్యింది. కీర‌వాణి నేప‌థ్య సంగీతం అందించ‌డం, ఫైన‌ల్ ఎడిట్ బాకీ ఉన్నాయి.

అయితే ఈ టీజ‌ర్ చూసిన వాళ్లు మాత్రం ఒక‌టే మాట చెబుతున్నారు. ‘విశ్వంభ‌ర న‌భూతో.. న భ‌విష్య‌త్త్‌’ అంటూ. విజువ‌ల్స్‌, చిరు లుక్‌, వ‌శిష్ట చూపించిన కొత్త లోకాలూ… ఇవ‌న్నీ మైమ‌ర‌పించేలా ఉన్నాయ‌ట‌. ‘క‌ల్కి’, ‘ఆర్‌.ఆర్‌.ఆర్‌’ టీజ‌ర్లు చూసిన‌ప్పుడు వ‌చ్చిన ఫీలింగ్ ‘విశ్వంభ‌ర‌’ టీజ‌ర్‌తో వ‌స్తుంద‌ని, హాలీవుడ్ స్థాయి మేకింగ్ ఈ టీజ‌ర్‌లో క‌నిపించ‌బోతోంద‌ని చెబుతున్నారు. అన్నింటికంటే ముఖ్యంగా చిరు లుక్‌.. ఫ్యాన్స్ కు భ‌లే న‌చ్చేస్తుంద‌ని, టీజ‌ర్ లో కొన్ని డైలాగులూ ఉన్నాయ‌ని, ‘విశ్వంభ‌ర‌’ కాన్సెప్ట్ మొత్తాన్ని ఈ డైలాగుల‌తో చెప్పే ప్ర‌య‌త్నం చేశార‌ని తెలుస్తోంది. ‘బింబిసార‌’ హిట్ట‌వ్వ‌డంతో వ‌శిష్ట‌కు దొరికిన అవ‌కాశం ఇది. రెండో సినిమాకే చిరంజీవిని డైరెక్ట్ చేయ‌డం మామూలు విషయం కాదు. ఆ అవ‌కాశాన్ని అందిపుచ్చుకొంటే వ‌శిష్ట పెద్ద ద‌ర్శ‌కుల జాబితాలో చేరిపోయిన‌ట్టే. రామ్ చ‌ర‌ణ్‌తో వ‌శిష్ట ఓ సినిమా చేయాల్సింది. ఆ ప్లేస్ లోనే చిరంజీవి సినిమా ప‌ట్టాలెక్కింది. ‘విశ్వంభ‌ర‌’ హిట్ట‌యితే, ఆటోమెటిగ్గా చ‌ర‌ణ్ సినిమా మొద‌లైపోతుంది. కాబ‌ట్టి వ‌శిష్ట‌కు ఈ సినిమా చాలా కీల‌కం.